“Media dhe polarizimi politik”- prezantimi i librit “Vdekja e së vërtetës” bëri bashkë të rinj të Rrjetit EDYN Albania dhe të interesuarve të tjerë, të cilët diskutuan me gazetarin Lutfi Dervishi për ndikimin e politikës tek media dhe ndikimin e medias te publiku.
Jetojmë në një kohë kur ideja e së vërtetës objektive tallet dhe shpërfillet. Teoritë dhe ideologjitë e diskredituara të konspiracionit janë rishfaqur, shkenca e provuar është sërish në diskutim dhe propaganda vërshon ekranet tona.
Mençuria e turmës ka uzurpuar kërkimin dhe ekspertizën dhe secili prej nesh ka mbetur i kapur pas besimeve që konfirmojnë më së miri paragjykimet tona.
Si u bë e vërteta një specie e rrezikuar? Kjo rënie filloi dekada më parë dhe forca kulturore e politike kontribuan në këtë stuhi.
Në mediat sociale, televizion, akademi dhe politikë, Kakutani identifikon tendencat – me origjinë si nga e djathta ashtu edhe nga e majta – që janë kombinuar për të ngritur subjektivitetin mbi faktin, shkencën dhe vlerat e përbashkëta.
