Nga Klodiana Kapo
Në mars të vitit 2020 i gjithë vendi u izolua. Pandemia e shkaktuar nga Covid-19 po përhapej me shpejtësi. Numri i personave të vdekur në botë rritej dhe të panjohurat mbi të sollën frikë dhe panik. Në këto ditë të pazakonta, Kryeministri Shqiptar Edi Rama, bën publike një video ku tregohej se si policia spanjolle dhunonte qytetarët të cilët kishin shkelur orarin e kufizimit. Pak minuta më pas, Faktoje, organizata që ofron shërbimin e verifikimit të fakteve në Shqipëri dhe që është pjesë e International Fact Checking Network (IFCN), verifikon të dhënat e filmimit, dhe deklaron se pamjet e publikuara nga kryeministri Edi Rama i përkisnin një proteste të ndodhur në qytetin Hirak, në Algjeri, më 7 mars 2020. Kryeministri Edi Rama, pranon se ai kishte rënë pre e dezinformimit[1].
Por pse ka rëndësi verifikimi i deklaratave, premtimeve apo filmimeve dhe fotove që përhapen me shpejtësi kudo? Bota e internetit[2] ka përpirë çdo qytetar të rruzullit tokësor. Në epokën e pandemisë, informimi u përqendrua kryesisht në botën digjitale, çka shkaktoi edhe infodeminë. Mungesa e të dhënave të sakta nga bota e mjekësisë i hapi rrugë prodhimit të informacioneve të pavërteta dhe të dëmshme për jetën e njerëzve. Frika dhe paniku, sollën shpërndarje të menjëhershme të lajmeve të ndryshme që qarkullonin në rrjetet digjitale.
Po përse faktet kanë rëndësi, edhe në një botë pa pandemi?
Faktoje, një organizatë e pavarur dhe transparente ofron një shërbim të ri të gazetarisë në vend. Gjatë këtyre dy viteve ka verifikuar mbi 300 deklarata dhe premtime ku më shumë se 60% e tyre rezultojnë të pavërteta apo gjysmë të vërteta.
